Tuesday, September 10, 2013

Malayo Kalang

Assalamualaykum wr wb

  Mandanga janji-janji politik calon-calon walikota Piaman periode 2013-2018 sabana mambuek kalang maloyo. Antah apo nan ado di kapalo inyo nan manganggap masyarakaik jo engak se bisa diumbuak jo janji. Salah satu pasangan calon walikota tu ado pernah maota ka mambuek jambatan nan manghubungkan Piaman jo pulau-pulau di subarang. Jambatan apo? Jambatan urek apo. Dima pitih e, ma dana e?

  Ado lo wakatu kampanye nan maota ka mambuek hotel bintang limo dakek kawasan pasie piaman. Timbua pertanyaan, inyo tu ka nio jadi walikota atau pangusaha? Apa relevansi e? Iko bukan tantang salah paham, jaleh bana inyo pribadi nan mangecek ka mambuek hotel bukan inyo barusaha mandatangkan investor ka Piaman. Jadi lai indak ota sajo tu?

   Parihal rancana mambuek jambatan panghubuang ka pulau tu supayo mamudahkan mobilitas masyarakat Piaman, lai indak bapikian sabalun ka maota tu? Bara kekuatan ekonomi Piaman? Bara gadang PAD Piaman? Lai tau sumber APBD Piaman tu dari ma sajo?

  Mari kito mambahas jo fakta bahwa, Kota Piaman adolah kota nan manggatuangkan iduiknyo pado Pamerintah Pusat. Labiah dari 90% APBD Kota Pariaman adalah anggaran pusat. Arti e, Piaman indak bisa iduik surang do, indak bisa tagak diateh kaki e surang do. Pendapatan Asli Daerah Kota Piaman sabana ketek. Indak usah disabuik jo angko, PAD Piaman indak talok maiduikan aparatur pamarintahnnyo salamo sabulan se. Kalo indak picayo cubolah tanyo ka urang babaju saragam dinas di kantua Walikota Piaman tu. Jan takuik rakyat punyo hak untuk tau (keterbukaan) informasi publik!

  Memang pilkada kota Piaman alah salasai. Talambek sabana mangecekan masalah ko. Tapi ambo raso indak baa do supayo kito tau, jadi pambalajaran ka diri kito, labiah mangenal parangai urang-urang nan nio mandapek kakuasan bahwa malangkik dapek iyo sabana lunak gigi daripado lidah. Kalo bisa mngicuah, baa kok indak, kicuah taruih! Nan muncuang e tasumbek dek pitih suap dari nan rakus jo kakuasaan tu tantu labiah mamiliah diam. Batanang.

Wassalam
___
Gambar: Google

Post a Comment

Whatsapp Button works on Mobile Device only

Start typing and press Enter to search